Opening doha 1
श्रीगुरु चरन सरोज रज निज मनु मुकुरु सुधारि ।
बरनऊँ रघुबर बिमल जसु जो दायकु फल चारि ॥
śrīguru carana saroja raja nija manu mukuru sudhāri
baranaūṁ raghubara bimala jasu jo dāyaku phala cāri
Opening doha 2
बुद्धिहीन तनु जानिके सुमिरौं पवनकुमार ।
बल बुद्धि बिद्या देहु मोहिं हरहु कलेस बिकार ॥
buddhihīna tanu jānike sumirauṁ pavanakumāra
bala buddhi bidyā dehu mohiṁ harahu kalesa bikāra
Chaupai 1
जय हनुमान ज्ञान गुन सागर ।
जय कपीस तिहुँ लोक उजागर ॥
jaya hanumāna jñāna guna sāgara
jaya kapīsa tihuṁ loka ujāgara
Chaupai 2
राम दूत अतुलित बल धामा ।
अंजनिपुत्र पवनसुत नामा ॥
rāma dūta atulita bala dhāmā
aṁjaniputra pavanasuta nāmā
Chaupai 3
महाबीर बिक्रम बजरंगी ।
कुमति निवार सुमति के संगी ॥
mahābīra bikrama bajaraṁgī
kumati nivāra sumati ke saṁgī
Chaupai 4
कंचन बरन बिराज सुबेसा ।
कानन कुंडल कुंचित केसा ॥
kaṁcana barana birāja subesā
kānana kuṁḍala kuṁcita kesā
Chaupai 5
हाथ बज्र औ ध्वजा बिराजै ।
काँधे मूँज जनेऊ साजै ॥
hātha bajra au dhvajā birājai
kāṁdhe mūṁja janeū sājai
Chaupai 6
संकर सुवन केसरीनंदन ।
तेज प्रताप महा जग बंदन ॥
saṁkara suvana kesarīnaṁdana
teja pratāpa mahā jaga baṁdana
Chaupai 7
विद्यावान गुनी अति चातुर ।
राम काज करिबे को आतुर ॥
vidyāvāna gunī ati cātura
rāma kāja karibe ko ātura
Chaupai 8
प्रभु चरित्र सुनिबे को रसिया ।
राम लखन सीता मन बसिया ॥
prabhu caritra sunibe ko rasiyā
rāma lakhana sītā mana basiyā
Chaupai 9
सूक्ष्म रूप धरि सियहिं दिखावा ।
बिकट रूप धरि लंक जरावा ॥
sūkṣma rūpa dhari siyahiṁ dikhāvā
bikaṭa rūpa dhari laṁka jarāvā
Chaupai 10
भीम रूप धरि असुर सँहारे ।
रामचंद्र के काज सँवारे ॥
bhīma rūpa dhari asura saṁhāre
rāmacaṁdra ke kāja saṁvāre
Chaupai 11
लाय सजीवन लखन जियाये ।
श्रीरघुबीर हरषि उर लाये ॥
lāya sajīvana lakhana jiyāye
śrīraghubīra haraṣi ura lāye
Chaupai 12
रघुपति कीन्ही बहुत बड़ाई ।
तुम मम प्रिय भरतहि सम भाई ॥
raghupati kīnhī bahuta baṛāī
tuma mama priya bharatahi sama bhāī
Chaupai 13
सहस बदन तुम्हरो जस गावैं ।
अस कहि श्रीपति कंठ लगावैं ॥
sahasa badana tumharo jasa gāvaiṁ
asa kahi śrīpati kaṁṭha lagāvaiṁ
Chaupai 14
सनकादिक ब्रह्मादि मुनीसा ।
नारद सारद सहित अहीसा ॥
sanakādika brahmādi munīsā
nārada sārada sahita ahīsā
Chaupai 15
जम कुबेर दिगपाल जहाँ ते ।
कबि कोबिद कहि सके कहाँ ते ॥
jama kubera digapāla jahāṁ te
kabi kobida kahi sake kahāṁ te
Chaupai 16
तुम उपकार सुग्रीवहिं कीन्हा ।
राम मिलाय राज पद दीन्हा ॥
tuma upakāra sugrīvahiṁ kīnhā
rāma milāya rāja pada dīnhā
Chaupai 17
तुम्हरो मंत्र बिभीषन माना ।
लंकेस्वर भए सब जग जाना ॥
tumharo maṁtra bibhīṣana mānā
laṁkesvara bhae saba jaga jānā
Chaupai 18
जुग सहस्र जोजन पर भानू ।
लील्यो ताहि मधुर फल जानू ॥
juga sahasra jojana para bhānū
līlyo tāhi madhura phala jānū
Chaupai 19
प्रभु मुद्रिका मेलि मुख माहीं ।
जलधि लाँघि गये अचरज नाहीं ॥
prabhu mudrikā meli mukha māhīṁ
jaladhi lāṁghi gaye acaraja nāhīṁ
Chaupai 20
दुर्गम काज जगत के जेते ।
सुगम अनुग्रह तुम्हरे तेते ॥
durgama kāja jagata ke jete
sugama anugraha tumhare tete
Chaupai 21
राम दुआरे तुम रखवारे ।
होत न आज्ञा बिनु पैसारे ॥
rāma duāre tuma rakhavāre
hota na ājñā binu paisāre
Chaupai 22
सब सुख लहै तुम्हारी सरना ।
तुम रच्छक काहू को डर ना ॥
saba sukha lahai tumhārī saranā
tuma racchaka kāhū ko ḍara nā
Chaupai 23
आपन तेज सम्हारो आपै ।
तीनों लोक हाँक तें काँपै ॥
āpana teja samhāro āpai
tīnoṁ loka hāṁka teṁ kāṁpai
Chaupai 24
भूत पिसाच निकट नहिं आवै ।
महाबीर जब नाम सुनावै ॥
bhūta pisāca nikaṭa nahiṁ āvai
mahābīra jaba nāma sunāvai
Chaupai 25
नासै रोग हरै सब पीरा ।
जपत निरंतर हनुमत बीरा ॥
nāsai roga harai saba pīrā
japata niraṁtara hanumata bīrā
Chaupai 26
संकट तें हनुमान छुड़ावै ।
मन क्रम बचन ध्यान जो लावै ॥
saṁkaṭa teṁ hanumāna chuṛāvai
mana krama bacana dhyāna jo lāvai
Chaupai 27
सब पर राम तपस्वी राजा ।
तिन के काज सकल तुम साजा ॥
saba para rāma tapasvī rājā
tina ke kāja sakala tuma sājā
Chaupai 28
और मनोरथ जो कोई लावै ।
सोई अमित जीवन फल पावै ॥
aura manoratha jo koī lāvai
soī amita jīvana phala pāvai
Chaupai 29
चारों जुग परताप तुम्हारा ।
है परसिद्ध जगत उजियारा ॥
cāroṁ juga paratāpa tumhārā
hai parasiddha jagata ujiyārā
Chaupai 30
साधु संत के तुम रखवारे ।
असुर निकंदन राम दुलारे ॥
sādhu saṁta ke tuma rakhavāre
asura nikaṁdana rāma dulāre
Chaupai 31
अष्ट सिद्धि नौ निधि के दाता ।
अस बर दीन जानकी माता ॥
aṣṭa siddhi nau nidhi ke dātā
asa bara dīna jānakī mātā
Chaupai 32
राम रसायन तुम्हरे पासा ।
सदा रहो रघुपति के दासा ॥
rāma rasāyana tumhare pāsā
sadā raho raghupati ke dāsā
Chaupai 33
तुम्हरे भजन राम को पावै ।
जनम जनम के दुख बिसरावै ॥
tumhare bhajana rāma ko pāvai
janama janama ke dukha bisarāvai
Chaupai 34
अंत काल रघुबर पुर जाई ।
जहाँ जन्म हरिभक्त कहाई ॥
aṁta kāla raghubara pura jāī
jahāṁ janma haribhakta kahāī
Chaupai 35
और देवता चित्त न धरई ।
हनुमत सेई सर्ब सुख करई ॥
aura devatā citta na dharaī
hanumata seī sarba sukha karaī
Chaupai 36
संकट कटै मिटै सब पीरा ।
जो सुमिरै हनुमत बलबीरा ॥
saṁkaṭa kaṭai miṭai saba pīrā
jo sumirai hanumata balabīrā
Chaupai 37
जै जै जै हनुमान गोसाईं ।
कृपा करहु गुरु देव की नाईं ॥
jai jai jai hanumāna gosāīṁ
kṛpā karahu guru deva kī nāīṁ
Chaupai 38
जो सत बार पाठ कर कोई ।
छूटहि बंदि महा सुख होई ॥
jo sata bāra pāṭha kara koī
chūṭahi baṁdi mahā sukha hoī
Chaupai 39
जो यह पढ़ै हनुमान चलीसा ।
होय सिद्धि साखी गौरीसा ॥
jo yaha paṛhai hanumāna calīsā
hoya siddhi sākhī gaurīsā
Chaupai 40
तुलसीदास सदा हरि चेरा ।
कीजै नाथ हृदय महँ डेरा ॥
tulasīdāsa sadā hari cerā
kījai nātha hṛdaya mahaṁ ḍerā
Closing doha
पवनतनय संकट हरन मंगल मूरति रूप ।
राम लखन सीता सहित हृदय बसहु सुर भूप ॥
pavanatanaya saṁkaṭa harana maṁgala mūrati rūpa
rāma lakhana sītā sahita hṛdaya basahu sura bhūpa